Человецы, почто всуе мятемся,
Днесь вси скоро ко гробу сберемся.
Житие человеческое, яко дым в мале ся являет,
И яко цвет травный внезапу увядает.
О смерте! ты всекрасное и любимое мне отъимаеш!
От другов и знаемых мя скоро разлучаеш;
Ко гробу праздна посылаеш,
И душу мою в темном аде затворяеш.
Где мои златотканныя одежды,
Несть мне в них ни единыя надежды;
Имения мои расточены и неприятельми
Моими зле расхищены.
О смерте! почто мне не оповеда своего приходу,
Дабы стерегся от тебя своего исходу.
О смерте! злонивая и гневливая,
Толкося на жалось мою скапливая,
Всего мя еси обнажила
И меж смрадными струпы положила.
Друзи мои далече от меня сташа,
И ноздри от смрада моего заткнуша.
И ныне все доброе веселие и слава мене минула,
Богатства и честь уже на веки уплынула.
Смерть мя, яко тать похищает,
Уже всю мою доброту и богатство погубляет.
От вас всех, любимых другов моих, разлучает
И не милостиво мечем мя посекает.
Злии беси на воздусе сети мне закидают
И зле меня в пути сем достизают.
Начаша на мене яко в ярости рыкати,
И нещадно ныне хотят душю мою разтерзати.
Увы мне яко полки мнози на мя собрании,
И в руках своих имяху мечи и стрелы обнажении.
Ко ангелом руце простирающее,
И ни единого зрю мне помогающа.
Придите друзи и зрите мою красоту тленную,
И познаете плоть мою очерненную.
Преминула уже вся жития моего слава,
И плоть моя уже червем пища стала,
Страшно убо в последний день труба вострубит,
И всех яко спящих от сна возбудит.
Придите друзи мои и припадите Христу любезно
И восплачите о мне в молитвах своих ко Господу слезно:
Дабы учинил мя в селениях своих вечно,
Во царствии своем, со всеми святыми вселитися безконечно.
(«Костромская старина» вып. 4)